Tang maw Salai

Salai Mai vai kikupna ka muh ciang in Kei muhna pawl khat hong kum nuam pong ing. Khialhna a om leh hong puah sak, hong ngaidam un. I pa te hun ciang ciang, tu laitak pawl khat a’ding in i pu te uh hun ciang ciang, Khamtung ah makai, u lian a tamzaw peen Tedimmite (Ciimnuaimite) hi. (Tedimmi ka cih ciang in Tedim gam a’teng te ka cihna hi lohi. Tedimmite cih peen hih ka lai at a suah pih pau tawh a sim a’ a thei pah te Tedim mi hi. Tua ahih man in Tedimmi cih ciang in Tonzang Township, Cikha Township, Kawlpi, Lamka, Shillong mun tuam tuam ah teng ta leh Tedimmi mah hi. Geographical min in Tedim, Tonzang, Cikha a tuam om hang in Minam in Tedim mite I hi hi.) Akoi akoi ah Tedim te in I dep hi. Tua a hih man in Tedim te peen mi mudahna I thuak hi. Khalkha om ngei te’n tel ding in hong lam en ing. Tedim lawng lawng cih kamal a za ngei om ni. Tua hang in 1970 khit sung pawl in Kawlgam University sangnaupang, Khamtungmi lak ah mi nam nih bek na om hi. Tedim leh Tedimlo te hi. 1971/72 pawl bang in Mandalay University ah Tedim te peen Tedim lo te sang in khat bek in ki tawm zaw hi. Thukhat la khat om leh Tedim te ahu pha in vai hawm zo in ki gual heu mah mah hi. Tua laitak in Tedim lo teng na ki thuah thei uh in thu khawng na vai hawm khawm thei uh hi. Ki muhdahna, ki etkhialhna cihte mi muh na ah aom kei zong in, simtham hazatna bel om gige hi. Tua ahih man in a sawt na lamteh University pi te aa a om (khah sah yah, Chin Literature and Culture Committee) sung bang ah Tedim te’n vom a cih leh kang ci uh a, Tedim te’n kang a cih leh vom a ci uh hi. Ka theih khial kei leh Salai Mai vai peen tua hun sung a’ hong piang hi. Kei, Zangkong ah sang kah lo ka hih man in, a mi ngiat aa ki hel I makai lui te a hi Uu Hang (Rev. Eddy Ngin Hang) te Uu Lian Thang (Pa Nang Lian Thang, Tokyo) te in tel peen ding uh hi. 1979/80 kum aa khah sah yah kiteelna khat bang ah Siamsin makai pa in Tedim lo te deih pa General Secretary ding in a propose leh, a mau deih pa hi na pi, Tedim te propose a hih man in buai mah mah uh cih thu, Siamsin makai pa gen kik za ngei ing. Tua a hih man in kei theihna pong mawk ciang ah, Salai Mai hong pian khiat na peen Tedimte I ginatna hang aa hong piang hi ci leng khial in ki um keng. I ginat man in mi te ih lang ah pang hi. Ka tawpna ding in hi thei leh ka lung gulh na khat hong gen pong mawk ning. Thupatna ah ka gen mah bang in ih Pa te (Pu te) peen Kumpi za in zong makai na hi uh aa, A mi te lak ah zong makai na hi uh hi. Tu hun ciang in eimi te a mi te lak ah makai din mun I ngah zo nawn kei (I tawm mahmah ta) hi. Mi nam dang te tawh ki pawlna te ah makai din mun aa a ding thei ding ki tawm mah mah hi. Kawlgam pan a te bang, kawlmi te tawh I ki thuah ding a kisapna om thei aa, a kipawl na te uh tawh I ki zop loh a phamawh hun om thei hi. Kamtung mite tawh zong I kisai loh phamawh na om thei hi. Tua bang mun te ah zong, a kisap leh a maikai zo/thei ding in om ciat leng cih ka lung gulh na hong pulak pong suak ing. Mite tung a i om man aa hong ki leh do a, hong piang khia thu hang in mi te buai lo in ei te i buai zaw hi. Tua sang in tua, mi tung aa i tuan na mun, i let kip zawhna ding in buai zaw leng cih zong ka lung gulh hi. Kei muhna tu-a bang dan hi pong. Khialhna a om leh hong puah phat sak un. I biak Topa in khat tek thupha hong pia ta hen.

Pau Khan Thawn
Singapore